Óbreytt líðan eftir bílveltu

Líðan piltsins sem slasaðist alvarlega í bílveltu á Akureyjavegi í Landeyjum er óbreytt. Vaktahafandi læknir á slysadeild Landspítalans segir að pilturinn, sem er tvítugur, sé bæði vakandi og talandi.

Sex voru í bílnum þegar hann valt á þriðja tímanum í nótt. Fimm voru fluttir Heilbrigðisstofnun Suðurlands á Selfossi og eru meiðsl þeirra talin minniháttar. Pilturinn, sem farþegi í bílnum, var hins vegar fluttur með þyrlu Landhelgisgæslunnar til aðhlynningar í Reykjavík.

Yfirlögregluþjónn hjá lögreglunni á Hvolsvelli, segir að slysið hafi átt sér stað rétt fyrir neðan Njálsbúð og hópurinn var að koma af dansleik þar.

Þá leikur ekki grunur á að ökumaður hafi verið undir áhrifum áfengis.