Varhugavert að ganga á Heiðarvatni

Lögreglan á Egilsstöðum varar við því að fólk gangi á Heiðarvatni á Fjarðarheiði. Afar sérstakar aðstæður hafa nú myndast á svæðinu.

Vatn hefur brotið sér leið í gegnum ísinn og flæðir nú ofan á svellinu. Vatnið hverfur síðan aftur undir snjó og getur hætta myndast þegar gengið er á ísnum.

Létt hefur til á Egilsstöðum og hefur lögreglan áhyggjur af því að fólk vilji fara út að hreyfa sig og að Heiðarvatn verði fyrir valinu. Hið sama má segja um þá sem nú ganga til rjúpu.

Því vill lögreglan ráða fólk frá því að spóka sig á Heiðarvatni.