Hungraður stari hnuplaði ávöxtum í Krónunni

Þessi hungraði stari stóðst ekki mátið í verslun Krónunnar á Granda í dag. Hann gæddi sér á perum og öðru góðgæti við lítinn fögnuð starfsmanna.

„Hann var bara hérna í morgun, hefur líklega flögrað inn í gærkvöldi," segir Kári Hilmarsson, vaktstjóri Krónunnar á Granda. „Hann hefur nú ekki valdið teljandi tjóni."

Svo virðist sem að stari sé sólginn í ávexti og hefur hann hætt sér niður á mannasvið öðru hverju til að næla sér í bita.

„Það kom meindýraeyðir hérna áðan. Hann vildi bíða með að fjarlægja greyið. Nokkrir kúnnar hafa reyndar forvitnast um hvort að það sé nú ekki hægt að þyrma dýrinu, en þetta verður að hafa sinn gang. Hann fer líklega á vit forfeðra sinna í kvöld."

Þá segir Kári að skiptar skoðanir séu um þennan nýjasta viðskiptavin Krónunnar.

„Viðskiptavinirnir er ekki allir jafn hrifnir af fuglinum og hið sama er að segja um starfsmenn," segir Kári að lokum.

Hægt er að sjá myndband frá ólátunum hér fyrir ofan.