Einar Bárðarson ráðinn forstöðumaður Höfuðborgarstofu

Einar Bárðarson hefur verið valinn úr hópi 27 umsækjenda til að taka við stöðu forstöðumanns Höfuðborgarstofu samkvæmt tilkynningu.

Höfuðborgarstofa ber ábyrgð á heildarkynningu Reykjavíkur á sviði ferðamála innanlands og utan. Stofnunin vinnur að því að skilgreina sóknarfæri og styrkleika Reykjavíkur á sviði ferðamála, m.a. með samþættingu nýsköpunar og vöruþróunar, markaðssetningar og viðburða í samræmi við Ferðamálastefnu Reykjavíkur.

Höfuðborgarstofa rekur upplýsingamiðlun fyrir ferðamenn í Reykjavík og sér um framkvæmd á skilgreindum borgarhátíðum, s.s. Vetrarhátíð, Menningarnótt og Barnamenningarhátíð, ásamt samráði og ráðgjöf við skipuleggjendur annarra viðburða. Höfuðborgarstofa heyrir undir Menningar- og ferðamálasvið Reykjavíkurborgar.

Staðan var auglýst laus til umsóknar í lok september sl. Að ráðningarferli og vali stóð ráðningarnefnd sem í sátu Svanhildur Konráðsdóttir, sviðsstjóri Menningar- og ferðamálasviðs Reykjavíkurborgar, Ellý K. Guðmundsdóttir, borgarritari og Þórólfur Árnason, verkfræðingur og ráðgjafi. Ráðningafyrirtækið STRÁ ehf. annaðist flokkun umsókna og aðstoð við mat og ráðgjöf.