Sóknarfæri í hugbúnaðarklasanum

Mikil tækifæri felast í auknu samstarfi meðal íslenskra hugbúnaðarfyrirtækja. Þetta er niðurstaða nýrrar skýrslu þar sem íslenski hugbúnaðargeirinn og möguleikar hans eru kortlagðir.

Skýrslan var unnin fyrir Íslandsstofu í samstarfi við Samtök upplýsingatæknifyrirtækja af Vilhjálmi Jens Árnasyni, verkefnisstjóra hjá Íslenska sjávarklasanum. Byggir hún meðal annars á viðtölum við forsvarsmenn hátt í 70 fyrirtækja í greininni.

„Það sem maður rekur augun fyrst í er einfaldlega hvað það er mikill kraftur í þessum geira og mikil tækifæri," segir Vilhjálmur og heldur áfram: „Þetta er fremur ung atvinnugrein, en fyrir rúmum áratug voru kannski fimm til tíu fyrirtæki sem voru í einhverjum útflutningi. Núna eru kannski 70 til 80 fyrirtæki sem mörg hver eiga í heilmiklum viðskiptum við erlenda aðila. Þannig að umsvifin í þessari ört vaxandi grein eru orðin mjög mikil og teygja sig um allan heim."

Velta þeirra um 70 fyrirtækja sem rætt var við í tengslum við skýrslugerðina var áætluð rúmlega 58 milljarðar króna og þá er talið að umsvif þeirra erlendis nemi um 37 milljörðum. Hjá fyrirtækjunum starfa samtals um 3.300 manns, þar af 2.100 á Íslandi. Um 80% fyrirtækjanna hafa hug á því að auka útflutning og erlend umsvif sín enn frekar. Þá telja þau sig flest vera tæknidrifin fremur en markaðsdrifin þótt markaðskunnátta sé talin sífellt að aukast.

Auka þarf samvinnu@Mark.Meginmál 1.m:Við vinnslu skýrslunnar voru hugbúnaðarfyrirtæki spurð út í samstarf sín á milli. Kom í ljós að um tveir þriðju fyrirtækjanna eiga í litlum sem engum samskiptum við önnur fyrirtæki í geiranum og þá töldu 90% fyrirtækja mögulegt að auka samstarfið.

Er það því niðurstaða skýrslunnar að miklir möguleikar geti falist í því að auka samvinnu innan greinarinnar með innleiðingu klasahugsunar. Þannig megi efla greinina, nýta mannafla betur og skapa meiri virðisauka.

„Það er verið að vinna af miklum krafti eftir klasahugmyndafræði í nágrannaríkjum okkar. Danir og Svíar hafa til að mynda þróað mjög stóran klasa, Eyrarsundsklasann, sem getur verið okkur ákveðin fyrirmynd," segir Vilhjálmur og bætir við: „Það liggur fyrir að í þessum geira hér á landi eru fleiri tækifæri en menn ná að anna, meðal annars vegna skorts á starfsfólki. Þarna kemur klasahugsunin til því með bættri samvinnu ættum við að geta nýtt kraftana betur og þannig skapað ný tækifæri og aukið arðsemi."

Til stendur að vinna frekar með þær ábendingar sem fram koma í skýrslunni. Þannig segir Vilhjálmur að lokum að Íslandsstofa hafi þegar kynnt aðgerðaráætlun fyrir árin 2013 og 2014 sem byggi á hugmyndun úr skýrslunni. Þá vonast hann til þess að Samtök upplýsingatæknifyrirtækja geti einnig nýtt niðurstöðurnar með það að markmiði að gera greininni kleift að vaxa og dafna á næstu árum.