Nauðsynlegt að hrista upp í kerfinu

Eva Bjarnadóttir, framkvæmdastjóri Geðhjálpar, var gagnrýnin á heilbrigðisáætlun ríkisins á fundi velferðarnefndar og segir í hana vanta mikilvæg atriði eins og árangursmælingar. Þá bendir hún á að heilsugæslan ætti að virka mun betur, sérstaklega þar sem hún eigi að vera fyrsti punkturinn í kerfinu sem fólk leiti til vegna geðheilbrigðismála. Sérstök geðheilbrigðisáætlun sé mikilvægt tæki til að hjálpa við að endurskoða kerfið, sem sé komið til ára sinna.

„Fólk hefur ekki efni á sálfræðingum svo vandamálin verða stærri en þau þurfa að vera. Fólk fær ekki hjálp í tæka tíð,“ segir Eva. „Geðheilbrigðismál eiga að vera í heildarstefnumótun um heilbrigðismál, en nú er þannig komið fyrir málaflokknum að það er nauðsynlegt að hugsa hlutina upp á nýtt og koma með sjálfstæða stefnumótun. Þetta verður mjög gott skref í því að hrista upp í kerfinu og gera það skilvirkara.“