LSH fær 150 milljónir í tæki

Landspítalanum (LSH) eru úthlutaðar 150 milljónir króna til tækjakaupa í fjáraukalögum þessa árs. Fjórðungssjúkrahúsið á Akureyri fær 50 milljónir króna. Fjáraukalögin voru afgreidd út úr fjárlaganefnd Alþingis í gærmorgun.

Björn Valur Gíslason, þingflokksformaður VG og formaður fjárlaganefndar, segir að heilt yfir sé um litlar breytingar að ræða.

„Niðurstaðan er vel innan allra skekkjumarka, sérstaklega miðað við síðustu ár og áratugi," segir hann. „Tíðindin eru kannski þau og að það sé að takast að halda fjárlög betur en áður."

Hann bendir á að þetta sé í fyrsta sinn í áratug sem framlög eru aukin til tækjakaupa á sjúkrahúsunum tveimur og þetta sé bara byrjunin. Fjárframlög til tækjakaupa á spítalanum hafi verið skorin niður um helming í góðærinu, en nú standi til að rétta skekkjuna við eins og hægt er.

Björn Zoëga, framkvæmdastjóri LSH, segir að með þessu sé verið að bæta spítalanum þau tækjakaup sem gerð hafa verið í brýnni neyð undanfarið.

„Við erum gífurlega ánægð með að verið sé að sýna okkur skilning á þessum kaupum. Þetta dekkar þau upp að einhverju marki," segir Björn.

Í fjárlögum næsta árs er gert ráð fyrir 200 til 260 milljónum króna í tækjakaup til spítalans. Björn segir spítalann þó þurfa um milljarð á ári í þrjú ár til að koma málum í höfn.

Aðrar breytingar í fjáraukalögum eru þær að vaxtagjöld eru tæpum 4,4 milljörðum lægri en búist var við og einnig kemur inn ríkisábyrgð vegna falls Kaupþings upp á 3,1 milljarð króna. Upphæðin er tilkomin vegna skuldabréfa sem fyrirrennarar Kaupþings gáfu út á meðan bankarnir voru enn í ríkiseigu á síðustu öld.