Lítið fer til forvarna við sjálfsvígum

Guðbjartur Hannesson velferðarráðherra sá fyrst tölur um sjálfsvígstilraunir hjá Landspítalanum í Fréttablaðinu í gær. Hann ætlar að skoða málið og afla upplýsinga frá Landlæknisembættinu í kjölfar umfjöllunarinnar.

„Þetta eru nýjar tölur fyrir okkur, við höfum aldrei fengið að sjá þær áður. En þetta er eins og með annað í heilbrigðiskerfinu að skráningu er ábótavant,“ segir hann. „Við munum skoða skráningar hjá Landlækni varðandi sjálfsvíg í kjölfar þessarar fréttar.“

Árlega fremja á bilinu 30 til 35 manns sjálfsvíg á Íslandi. Tíðnin hefur staðið í stað undanfarinn áratug og jókst ekki eftir efnahagshrunið.

Ríkið eyrnamerkir sjö milljónir á ári í forvarnir gegn sjálfsvígum. Féð rennur til Landlæknis og í laun eins hjúkrunarfræðings í hlutastarfi. Til samanburðar er um 200 milljónum varið í forvarnir gegn umferðarslysum, en banaslysum í umferðinni hefur blessunarlega fækkað á undanförnum árum og eru þau nú yfirleitt á bilinu 10 til 20 á ári.

Landspítalinn tekur á móti um 500 tilfellum árlega vegna sjálfsvígstilrauna og hefur fjöldinn margfaldast síðan árið 2007. Eins og greint var frá í Fréttablaðinu í gær er þó talið að fjöldatölurnar hafi verið vanmetnar áður, þar sem sjálfsvígum hefur ekki fjölgað eins og skráðum tilraunum.

Guðbjartur segir mikla vinnu vera unna varðandi forvarnir gegn sjálfsvígum, bæði innan skóla- og heilbrigðiskerfisins. Hann segir jákvætt að fá nýjar upplýsingar inn í þá vinnu en ítrekar nauðsyn þess að vinna hlutina heildstætt eins og áætlanir innan heilbrigðiskerfisins gera ráð fyrir, meðal annars með innleiðingu rafrænnar sjúkraskrár.

Í Fréttablaðinu í gær sagði Páll Matthíasson, framkvæmdastjóri geðsviðs LSH, að tölur um fjölgun sjálfsvígstilrauna gætu þýtt að um hafi verið að ræða vanmat á fyrri tölum, þar sem eiginlegum sjálfsvígum hafi ekki fjölgað jafnmikið.