Reynt að þagga niður ásakanir

Kaþólska kirkjan á Íslandi reyndi ítrekað að þagga niður ásakanir um andlegt og kynferðislegt ofbeldi gagnvart nemendum.

Þetta eru niðurstöður rannsóknarnefndar kaþólsku kirkjunnar, sem í gær kynnti skýrslu um rannsókn sína á starfsemi skólans á meðan kirkjan starfrækti hann og á sumardvöl á vegum kirkjunnar allt frá árinu 1946.

Nefndin ræddi við 30 einstaklinga, þar á meðal átta manns sem urðu fyrir kynferðislegu ofbeldi. Nefndin tekur þó ekki afstöðu til þess hvort þær ásakanir eigi við rök að styðjast.

Tveir gerendur eru nafngreindir í skýrslunni: Séra Georg, sem var skólastjóri Landakotsskóla, og Margrét Müller kennari. Greint er frá því að ásakanir hafi komið fram gagnvart tveimur öðrum prestum og einum kennara, en þeir eru ekki nafngreindir og enginn þeirra starfar hjá skólanum lengur. Annar presturinn er látinn, en kennarinn var kærður fyrir kynferðislega áreitni. Sú rannsókn var að lokum felld niður og hætti hann störfum fljótlega eftir það.

Í skýrslunni kemur fram að biskupar, prestar og reglusystur kaþólsku kirkjunnar hér á landi hafi vanrækt skyldur sínar til að rannsaka mál í kjölfar ásakana.

Pétur Bürcher, núverandi biskup kaþólsku kirkjunnar á Íslandi, segist í yfirlýsingu biðjast afsökunar „í fullkominni auðmýkt andspænis þeim persónum sem í raun eiga hér hlut að máli“.