Brask með hátíðarmiða vandamál

Mikið magn Iceland Airwaves-tónleikamiða er í boði á svörtum markaði fyrir hátíðina í ár. Tugir miða eru í boði á vefsölutorginu Bland.is og kosta þeir frá 12 þúsund krónum upp í 30 þúsund.

Hátíðin hófst á miðvikudag og stendur alla helgina. Miðar á hátíðina seldust upp um miðjan ágúst, fyrr en nokkru sinni.

„Það er alltaf fólk sem kaupir miða og fer í einhverja ævintýraleit með þá,“ segir Grímur Atlason, framkvæmdastjóri Iceland Airwaves. Hann viðurkennir að svartamarkaðsbrask sé vandamál. „Fólk getur ekki vitað hvort það er að kaupa ósvikna vöru.“

Hátíðarhaldarar Iceland Airwaves heimila ekki endursölu á miðunum en Grímur segir erfitt að koma í veg fyrir það. Hann spyr sig hvers vegna fólk kaupi ekki miða í forsölu mun ódýrar en miðinn býðst í endursölu þegar hátíðin er hafin.

„Það eru ekki mörg armbönd sem á eftir að ná í, við erum með það allt á skrá. En það er alls konar fólk sem langar að fara að skemmta sér núna,“ segir Grímur.

Miðarnir sem verið er að selja á vefnum og í endursölu eru ávísanir á armböndin sem hátíðargestir verða að bera til að komast inn á tónleikastaði.