Mæta mikilli þörf á vistrými

Sinnum heimaþjónusta kynnir í dag Heimilið, nýtt búsetuúrræði fyrir bæði eldri borgara og yngra fólk sem þarf á umönnun að halda.

Heimilið er í Klaustrinu í Garðabæ, fyrrum hvíldarheimili St. Jósefssystra við Holtsbúð.

„Við höfum starfrækt heimaþjónustu í rúm fjögur ár og þjónustum nú um tvö hundruð heimili á höfuðborgarsvæðinu. Á þessum tíma höfum við fundið mikla þörf fyrir svona úrræði,“ segir Ásta Þórarinsdóttir, framkvæmdastjóri Sinnum, í samtali við Fréttablaðið.

Ásta segir ættingja skjólstæðinga Sinnum hafa spurt út í möguleika á meiri vöktun, en niðurstaðan hafi verið að opna Heimilið þar sem sextán herbergi eru í boði fyrir einstaklinga og hjón eða pör.

„Biðlistar fyrir eldri borgara eftir plássi á hjúkrunarheimilum eru mjög langir, og við miðum þjónustuna við þann hóp, en ekki síður við yngra fólk sem, vegna persónulegra aðstæðna, þarf á slíku úrræði að halda.“ Stærstu viðskiptavinir Sinnum eru opinberir aðilar, til dæmis sveitarfélög, sem kaupa þjónustu fyrir skjólstæðinga sína og Ásta býst við því að bæði sveitarfélög og einstaklingar muni nýta sér þjónustu þeirra.