Fjárdráttur við HÍ í rannsókn í þrjú ár

Lögregla rannsakar enn mál konu sem var kærð árið 2009 fyrir að draga sér fé frá Raunvísindastofnun Háskóla Íslands. Á meðan bíður skaðabótamál hennar gegn skólanum meðferðar fyrir dómi.

Konan var kærð til lögreglu haustið 2009. Við reglubundið eftirlit Ríkisendurskoðunar á bókhaldi Háskóla Íslands hafði komið í ljós misræmi upp á tæpar tvær milljónir króna, að því er sagði í frétt DV sumarið 2010. Konan var grunuð um að hafa dregið sér féð smátt og smátt á nokkurra mánaða tímabili.

Lögreglan hefur síðan haft það til rannsóknar en engin ákæra hefur verið gefin út og málið ekki verið látið niður falla.

Konunni var sagt upp störfum eftir að málið kom upp. Hún taldi að ólöglega hefði verið staðið að uppsögninni og höfðaði skaðabótamál á hendur skólanum, Magnúsi Tuma Guðmundssyni, deildarstjóra jarðvísindadeildar, og Sigurði Guðnasyni, framkvæmdastjóra Raunvísindastofnunar.

Það mál verður tekið fyrir í Héraðsdómi Reykjavíkur í næstu viku, en er engu að síður í biðstöðu á meðan ekki er fengin niðurstaða í fjárdráttarrannsókninni.