Velti því fyrir sér að hætta þingmennsku

Róbert Marshall velti því fyrir sér að bjóða sig ekki fram til þings á ný áður en hann ákvað að ganga til liðs við Bjarta framtíð. Hann ræddi þau áform sín við Guðmund Steingrímsson, forsvarsmann Bjartrar framtíðar, fyrir nokkrum vikum og í kjölfarið hóf hann að skoða málefnastarf flokksins.

„Það er það sem ræður ákvörðuninni fyrst og fremst. Mér finnst mjög jákvæðir hlutir þarna á ferðinni sem ég vil taka þátt í. Það er verið að vinna að hlutunum allt öðruvísi og hugmyndin er að vinna síðan inni á þinginu með allt öðruvísi hætti en þessir gömlu flokkar gera. Hafandi reynt það get ég borið virðingu fyrir þeim sem vilja gera það áfram, en ég vil það ekki fyrir mitt leyti. Ég vil reyna að nálgast þetta með öðrum hætti, ég held að það sé hægt að gera þetta betur," segir Róbert.

Hann greindi Jóhönnu Sigurðardóttur og Magnúsi Orra Schram, formanni og þingflokksformanni Samfylkingarinnar, frá ákvörðun sinni í gærmorgun. Að því loknu tilkynnti hann ákvörðunina fyrir þinginu. Hann hyggst styðja ríkisstjórnina út kjörtímabilið.