Samið um olíuvarnir á norðurslóðum

Aðildarríki Norðurskautsráðsins hafa náð saman um bindandi samning um sameiginlegar varnir og viðbrögð vegna olíumengunar á norðurslóðum.

Gengið var frá samningnum í Reykjavík í gær á fundi þar sem um sjötíu fulltrúar allra norðurskautsríkjanna hittust gagngert til að ná saman um málið.

Í samningnum, sem verður útfærður nánar næstu mánuði og undirritaður á fundi ráðherra ríkjanna næsta vor, felst skuldbinding um gagnkvæma aðstoð komi til olíumengunarslyss. Meðal annars er gert ráð fyrir að samstarfið felist í upplýsingamiðlun og viðbragðsæfingum auk þess sem ríkin búa þegar yfir margvíslegum búnaði og þekkingu sem getur nýst í þessum efnum.

„Þetta er gríðarlega mikilvægur áfangi," segir Össur Skarphéðinsson utanríkisráðherra í samtali við Fréttablaðið.

„Þessi samningur er sögulegur og afar mikilvægur ávinningur, því að gerð þessa samnings hefur verið einn af burðarásunum í norðurslóðastefnu Íslands gagnvart umheiminum á liðnum árum og ég fagna því sérstaklega að lokahönd er lögð á samninginn á Íslandi."