Bólusetning kom í veg fyrir 20.000 svínaflensusýkingar

Sóttvarnalæknir áætlar að á Íslandi hafi bólusetning gegn svínainflúensu veturinn 2009/2010 komið í veg fyrir 20 þúsund sýkingar hið minnsta, 70 sjúkrahúsinnlagnir, sjö innlagnir á gjörgæsludeild og eitt dauðsfall.

Haraldur Briem sóttvarnalæknir segir að margir hafi þegar gleymt því ástandi sem hér kom upp vegna svínainflúensunnar, og megi kannski skýra það með því að þjóðin var uppteknari af hruninu en nokkru öðru á þeim tíma. ?Hins vegar var íslenskt heilbrigðiskerfi þanið til hins ýtrasta um tíma; gjörgæsludeildir voru fullar af fólki og margir fleiri mjög veikir. Við hefðum ekki mátt við neinu, slysum eða öðru. Tveir einstaklingar létust vegna inflúensunnar hið minnsta, svo sannað sé. Það er engin spurning að átakið kom í veg fyrir að faraldurinn héldi áfram á fullum krafti.?

Á Íslandi voru 150 þúsund manns bólusettir með bóluefninu Pandemrix, en stjórnvöld samþykktu að kaupa 300 þúsund skammta af lyfinu í september 2009. Kostnaðurinn við þá aðgerð var 380 milljónir króna á þeim tíma, en þá var talið að hver sem kysi að láta bólusetja sig þyrfti tvo skammta af lyfinu. Einn skammtur reyndist hins vegar nóg, að sögn Haraldar og því gekk töluvert magn bóluefnisins af.

Viðmælendur Fréttablaðsins segja að erfitt sé að meta árangur bólusetningarinnar í krónum og aurum en ljóst sé að stórar upphæðir hafi sparast.

Haraldur segir niðurstöðurnar samrýmast mati sænsku sóttvarnastofnunarinnar, en í nýlegu uppgjöri hennar vegna svínaflensunnar þar í landi kemur fram að bólusetningin hafi komið í veg fyrir 60 dauðsföll, 1.400 sjúkrahúsinnlagnir og um 200 innlagnir á gjörgæsludeild. Eins og hér á landi var um helmingur sænsku þjóðarinnar bólusettur með Pandemrix á ofangreindu tímabili.

Haraldur segir að átakið sé það stærsta í íslenskri sögu og leita þurfi aftur til áranna 1954 og 1955 til að finna eitthvað viðlíka, en þá var reynt að bólusetja sem allra flesta vegna lömunarveikifaraldurs sem þá gekk yfir landið.- shá