Gumað af góðum árangri flokkanna

Fundir stjórnarflokkanna um helgina einkenndust af því að kosningar eru í nánd. Áhersla var lögð á góðan árangur í efnahagsmálum og línurnar lagðar fyrir kosningarnar. Oddný G. Harðardóttir yfirgefur ríkisstjórnina 1. október.

Hvað gerðist á fundum stjórnarflokkanna?

Flokksráðsfundur Vinstrihreyfingarinnar – græns framboðs var haldinn um helgina og einnig flokksstjórnarfundur Samfylkingarinnar. Engin stórtíðindi gerðust á fundunum, en tilkynnt var um endurkomu Katrínar Júlíusdóttur úr fæðingarorlofi, en hún tekur við sem fjármálaráðherra 1. október.

Evrópumálin skilja flokkana að og mátti glöggt sjá þess merki á fundunum. Vinstri græn samþykktu ályktun þar sem umræðu sem nú fer fram um samskipti Íslands og ESB er fagnað og hvatt til að henni verði haldið áfram. Hvatt er til umræðu um hvernig þátttöku í alþjóðasamstarfi verði háttað og hvaða hagsmuni beri að verja.

Jóhanna Sigurðardóttir, formaður Samfylkingarinnar, lagði hins vegar áherslu á mikilvægi þess að aðildarviðræðum yrði lokið og samningur borinn undir þjóðaratkvæði. Hún sagði það bera vott um lítið málefnalegt sjálfstraust að vilja stöðva viðræður við ESB fyrir kosningar, nokkuð sem nokkrir forráðamann Vinstri grænna hafa ámálgað.

„Með sama hætti finnst mér ekki boðlegt að einstakir stjórnmálamenn eða flokkar komi í veg fyrir að þjóðin fái að taka afstöðu til samningsniðurstöðu um aðild að ESB þegar hún liggur fyrir. Og sérkennilegt að íhaldið vilji beita slíkri forræðishyggju.“

Katrín Jakobsdóttir, varaformaður Vinstri grænna, sagði sín stærstu vonbrigði á kjörtímabilinu vera að samstaðan og samheldnin sem einkennt hefðu flokkinn frá upphafi væru horfin. Hún sagði að rétt hefði verið að samþykkja ríkisstjórnarsamstarfið, þrátt fyrir ESB-umsókn, enda mundi þjóðin eiga síðasta orðið.

„Hvers vegna vildum við þjóðaratkvæðagreiðslu um Atlantshafsbandalagið og veru erlends hers á Íslandi, nema vegna þess að við treystum þjóðinni? Við samþykktum aðild að ríkisstjórn sem hafði umsókn um aðild að Evrópusambandinu í samstarfsyfirlýsingu.“

Katrín sagði Íslendinga hafa tekist að vinna sig úr kreppunni hraðar en aðrar þjóðir. Verðbólgan væri komin niður í 4,6%, sem og atvinnuleysi, og kröftugur vöxtur væri kominn í

landsframleiðsluna.

Jóhanna tók í sama streng. Aðeins vantaði 2,5% til að landsframleiðsla væri jöfn og á hátindi bóluhagkerfisins. Þá hefði kaupmáttur launa aukist um 4% á tveimur árum og enn meira hjá þeim lægst launuðu.

kolbeinn@frettabladid.is