Grúví danspopp

Tónlist. Human Woman. Human Woman.

Human Woman er rafpoppdúó skipað þeim Jóni Atla Helgasyni (Sexy Lazer), hárgreiðslumanni úr Hairdoctor og Gísla Galdri plötusnúð sem hefur verið meðlimur í fjölmörgum sveitum, meðal annars Trabant og Ghostigital. Þeir félagar eru nú búsettir í Kaupmannahöfn og gefa út hjá HFN-plötufyrirtækinu í Hamborg, en bæði Kasper Björke og Trentemöller eru á samningi hjá HFN.

Tónlist Human Woman er dansvæn og grúví og það flaug í gegn um hugann þegar ég hlustaði á hana í fyrsta skipti að loksins væri kominn einhver sem gæti veitt Gusgus samkeppni í þessari tegund tónlistar hér á landi. Það er margt mjög vel gert á plötunni og hún er stútfull af fyrsta flokks hráefni fyrir dansgólf og remixara. Taktarnir eru margir frábærir (flottar bassalínur!) og þeir Jón Atli og Gísli eru naskir í að búa til poppaðar laglínur. Nokkur laganna eru hrein snilld. Delusional, DDDI, Love Games, It?s Gonna Hurt You og Dike Bike eru öll afbragð. Textarnir eru líka skemmtilegir, fullir af mjúkum og áreynslulausum töffaraskap.

Human Woman er ekki fullkomin plata. Lögin eru misgóð og sums staðar mætti vera aðeins meiri kraftur, en á heildina litið er þetta samt mjög fín danspoppplata sem óhætt er að mæla með.

Niðurstaða: Hárdoktorinn Jón Atli og Gísli Galdur með flotta rafpoppplötu.