Þóttist vera starfsmaður Microsoft

Karlmaður hringdi í hjón hér á landi í gærkvöld og kynnti sig sem starfsmann Microsoft í Bretlandi. Hann sagði að einhver villa hefði komið upp sem þau þyrftu að bregðast við og bað fólkið um að setjast við tölvu sína og kveikja á henni. Fólkinu fannst maðurinn eitthvað grunsamlegur og svo reyndist vera.

Ekki er vitað hvort hjónin urðu fyrir tjóni af samskiptum við Bretann, en lögreglan á höfuðborgarsvæðinu varar við óprúttnum einstaklingum sem setja sig í samband við fólk hér á landi og reynir að gabba það til að gefa bankaupplýsingar eða nálgast fjármuni fólks eftir einhverjum leiðum. Flestir kannast við einskonar svikapóst sem fólk fær í tölvupósti og jafnvel tilkynningar bréfleiðis að fólk hafi unnið háar fjárhæðir í lottó eða fólk sé beðið um aðstoð að koma fjármunum á milli bankareikninga.

Lögreglan biður fólk um að vera vakandi gagnvart svona háttsemi sem er ansi umfangsmikil í hinum stóra heimi sem Ísland er partur af. Vilji fólk koma ábendingum til lögreglunnar um svona málefni má senda línu á: svikapostur hjá rls.is