Koma til Vestmannaeyja klukkan hálf þrjú

Dráttarskipið Lóðsinn er nú á leið til Vestmannaeyja með skipið Maggý VE 108 í togi og áætlað er að það verði komið til hafnar eftir rúman hálftíma.

Eldur kom upp í skipinu í morgun og kom leki inn í vélarrúmið á sama tíma. Sjö manns voru um borð í skipinu.

Þeir fóru strax í flotgalla og voru óhultir, en áhafnarmeðlimir slökktu eldinn sjálfir. Tvær dælur voru settar um borð í Maggý og er talið að þær hafi náð að dæla mest öllum sjónum frá borði.

Þór björgunarskip slysavarnarfélagsins Landsbjargar aðstoðar lóðsinn við að koma skipinu til hafnar. Þyrla Landhelgisgæslunnar var einnig kölluð út í morgun.