Mikið um kynferðislega misnotkun á bandarískum skátum

Í ljós er komið að þagað var um fleiri hundruð tilvika um kynferðislega misnotkun á ungum drengjum innan bandarísku skátasamtakanna US Boy Scouts á löngu tímabili.

Það er blaðið Los Angeles Times sem segir frá þessu en blaðið hefur undir höndum 1.600 trúnaðarskýrslur frá skátasamtökunum sem ná yfir tímabilið frá árinu 1971 fram til 1991.

Í Þessum skýrslum er greint frá um 500 tilvikum þar sem uppvíst varð um kynferðislegt ofbeldi gagnvart drengjunum og sögðu þeir ýmist frá þessu sjálfir eða foreldrar þeirra.

Í 80% þessara tilvika var málið ekki tilkynnt til lögreglu eða annarra yfirvalda og þeim haldið leyndum. Auk þess kemur í ljós að í um 100 tilvika hafi stjórnendur skátasamtakanna beinlínis komið í veg fyrir að misnotkunin var kærð.

Í viðtölum blaðsins við menn innan skátasamtakanna kemur fram það sjónarmið að samtökin hafi viljað þagga málin niður til að verja drengina gegn opinberri umfjöllun. Það leiddi hinsvegar til þess í einhverjum tilvika að þeir seku misnotuðu einnig börn kynferðislega utan samtakanna.

Nú hafa skátasamtökin sent frá sér opinberlega afsökun þessari misnotkun.