„Engin þjóð getur haft jafn mikil áhrif á Sýrland og Rússar“

Össur Skarphéðinsson, utanríkisráðherra, fundaði í dag með Vladimír Títov, varautanríkisráðherra Rússlands, en hann er hér í vinnuheimsókn.

Margt bar á góma á fundi ráðherranna. Þar á meðal ræddu þeir stöðu mála í Sýrlandi sem og málefni Palestínu.

Í samtali við Vísi sagði Össur að hann hefði upplýst varautanríkisráðherrann um stöðu Íslands í málefnum Sýrlands.

„Og hún er afdráttarlaus," segir Össur. „Að öll ríki ættu að beita sér fyrir friði og að forsenda friðar í Sýrlandi væri að koma Sýrlandsforseta, Bashar al-Assad, frá völdum."

„Það eru sterk tengsl milli Rússa og Sýrlendinga. Engin þjóð getur haft jafn mikil áhrif á yfirvöld í Sýrlandi en Rússland."

Össur og Títov ræddu einnig samstarf Íslendinga og Rússa í Norðurslóðamálum og hvernig það mætti víkka mætti út með rannsóknum og verkefnum í nýtingu jarðhita, einkum til húshitunar á austursvæðum Rússlands.

Rædd voru viðskipti Rússlands og Íslands, milliríkjasamningar, menningarstarf og formennska Rússa í Eystrasaltsráðinu.