Illugi vill frekar betri spítala en ný jarðgöng

Það voru gerð mistök þegar ákveðið var að veita 10 milljörðum í lán vegna framkvæmda við Vaðlaheiðagöng, í stað þess að bæta tækjakost Landspítalans og Fjórðungssjúkrahússins á Akureyri. Þetta sagði Illugi Gunnarsson, þingmaður Sjálfstæðisflokksins, á Alþingi í dag.

Í umræðunni um störf þingsins var staða Landspítalans til umræðu. Sigríður Ingibjörg Ingadóttir, þingmaður Samfylkingarinnar, tók málið upp í umræðunum og Björn Valur Gíslason, þingmaður VG og formaður fjárlaganefndar, svaraði henni. Þau bentu meðal annars bæði á að vandinn væri ekki nýr. Fullyrti Björn Valur meðal annars að framlög til tækjakaupa á Landspítalanum hefðu dregist saman um 43% á árunum 2003-2008.

Illugi svaraði því til að í fyrra hefði verið ákveðið að veita lán vegna Vaðlaheiðaganga í stað þess að takast á við vanda Landspítalans. „Þetta er áminning um það að við þurfum að forgangsraða þegar kemur að því að ráðstafa skattfé borgaranna," segir Illugi.

Orð Kára Stefánssonar, forstjóra Íslenskrar erfðagreiningar, Í Reykjavík síðdegis á dögunum voru á svipaða leið og orð Illuga Gunnarssonar. Hann sagði þó að allir stjórnmálaflokkar hefðu staðið sig jafn illa við að gæta hagsmuna Landspítalans.