Fáir ferðamenn sækja Vestfirði heim

Aðeins 3,2 prósent ferðamanna sem komu hingað til lands síðasta vetur fóru til Vestfjarða eða litlu fleiri en fóru á hálendið. forstöðumaður Markaðsstofu Vestfjarða segir erfiðar samgöngur helstu ástæðuna.

Á meðan sumum þykir vart þverfótað fyrir ferðamönnum hér á landi eru sumir landshlutar nærri útundan í ferðaþjónustunni svo sem Vestfirðir. Í vikunni greindi vestfirska blaðið Bæjarins besta frá því að aðeins 3,2 prósent ferðamanna, sem hingað komu á tímabilinu september í fyrra til maí á þessu ári, heimsóttu Vestfirði.

Gústaf Gústafsson, Markaðsstjóri Ferðastofu Vestfjarða, hefur trú á því að vel sé hægt að gera betur.

„Auðvitað er það þannig að þegar þú tekur töluna 3,2 prósent þá er það lítið, sérstaklega borið saman við aðra landshluta, sem dæmi má nefna að á sama tíma komu 2 prósent á hálendið. En samgöngur á Vestfirði eru akkílesarhællinn, sérstaklega yfir vetramánuðina. Samgöngurnar eru ekkert góðar, svo sem rútuferðir eða almenningssamgöngur," segir Gústaf.

Þá telur hann að það þurfi að bæta flugvallaraðstöðu til að reyna draga úr því að flugferðir falli niður vegna veðurs yfir veturinn. Gústaf segir að þrátt fyrir allt hafi jákvæð þróun hafi orðið í ferðamennsku að undanförnu. Fleiri staðir á Vestfjörðum séu til dæmis opnir yfir veturinn en var.

Þá nefnir hann að verið sé að byggja hótel á Patreksfirði sem mjög hafi vantað á Suðurfirðina. Hins vegar þurfi að gera mikið betur. Fjöldi tækifæra séu ekki nýtt og segir að mælingar hafi sýnt að Vestfirðir hafi staðið upp úr þegar ánægja með þjónustu hafi verið mæld auk þess sem komið hafi í ljós að 10 af hverjum 10 ferðamönnum sem heimsækja svæðið ætla mæla með því við aðra.

„Það er auðvitað alveg rosalega mikilvægt tækifæri," segir Gústaf.