Kristján Þór: Til marks um „mikinn metnað“ hjá Tryggva Þór

Kristján Þór Júlíusson, þingmaður Sjálfstæðisflokksins, segist hvergi banginn við mótframboð Tryggva Þórs Herbertssonar í baráttunni um fyrsta sæti á lista Sjálfstæðisflokksins í Norðausturkjördæmi, fyrir alþingiskosningarnar í apríl á næsta ári. Kjördæmisþing flokksins stendur nú yfir í Mývatnssveit.

Tryggvi Þór, sem er annar þingmaður Sjálfstæðisflokksins í Norðausturkjördæmi, ætlar að etja kappi við Kristján Þór, sem er oddviti flokksins í kjördæminu, í baráttu um fyrsta sætið á lista flokksins í alþingiskosningunum í apríl á næsta ári. Frá þessu var greint í fréttum Stöðvar 2 á föstudaginn.

Kristján Þór segir mótframboð ekki hafa komið sér sérstaklega á óvart, en hann segist jafnframt finna fyrir miklum stuðningi í kjördæminu.

„Þetta verður barátta um oddvitasætið, og það er hollt og gott fyrir flokkinn," sagði Kristján Þór í samtali við fréttastofu í morgun.

„Mér finnst þetta til marks um mikinn metnað hjá Tryggva Þór Herbertssyni," sagði Kristján Þór.

Á kjördæmisþinginu, sem hófst í gær, hafa fimm tilkynnt þátttöku í prófkjörinu. Auk Tryggva Þórs og Kristjáns Þórs hefur Jens Garðar Helgason bæjarfulltrúi í Fjarðabyggð tilkynnt um að hann sækist eftir fjórða til fimmta sæti, Bergur Þorri Benjamínsson á Akureyri sækist eftir fimmta sæti og Ásta Kristín Sigurjónsdóttir bæjarfulltrúi í Fjarðabyggð sækist eftir þriðja sætinu. Reglur prófkjörsins, sem líklegt er að fari fram í janúar, verða ákveðnar á næstu vikum, en mestar líkur eru á því að kosið verði um sex efstu sætin á listanum. Enginn hefur enn lýst því yfir að hann sækist eftir öðru sæti á lista flokksins.