89 ár á milli og bæði með rauða nefið

Þau komu fram saman í gær til að vekja athygli á hinum árlega Degi rauða nefsins föstudaginn 7. desember næstkomandi en í dag hefst sala á rauðu nefjunum. Með sölu þeirra vill UNICEF gleðja landsmenn en vekja um leið athygli á þeirri neyð sem steðjar að milljónum barna um allan heim.

Dagur rauða nefsins er árviss viðburður hjá UNICEF á Íslandi. Hann nær hámarki í metnaðarfullum söfnunar- og skemmtiþætti í opinni dagskrá á Stöð 2 og hér á Vísi. Þjóðþekktir grínistar, leikarar, skemmtikraftar, tónlistarmenn og fleira hæfileikafólk fara á kostum í skemmtiþættinum og allir gefa vinnu sína. Meginmarkmiðið þáttarins er að bjóða Íslendingum að gerast heimsforeldrar og styðja þar með í hverjum mánuði hjálparstarf UNICEF.

Rauðu nefin í fyrra, þau Skotta, Skreppur og Skjóða, nutu gríðarlegra vinsælda hjá landsmönnum en nefin í ár koma í litlum glösum sem innihalda ráðlagðan dagskammt fyrir þau sem vilja bæta heiminn. Á glösunum stendur meðal annars: Notkun: Setjið rauða nefið upp og gleðjið samferðafólk með góðu sprelli. Aukaverkun: Með kaupum á þessu rauða nefi styrkir þú hjálparstarf UNICEF fyrir bágstödd börn.

Nefin kosta 1.000 krónur og eru fáanleg í Bónus, Hagkaup, útibúum MP banka, Dominos og á kaffihúsum Te og kaffis.