Er Fram með tak á FH?

Þrír leikir fara fram í N1-deild karla í handbolta í kvöld og flestra augu verða á leik FH og Fram í Kaplakrika.

FH-ingar hafa unnið alla þrjá deildarleiki sína eftir EM-fríið en Framarar eru í sárum eftir tvö töp á móti Haukum í röð, í deild (17-23) og bikarúrslitum (23-31). Framarar búa hins vegar að því að hafa unnið FH-inga tvisvar sinnum í vetur og þar á meðal 28-23 í fyrri leiknum í Krikanum.

Hinir leikir kvöldsins eru Afturelding-Akureyri á Varmá klukkan 18.30 og Haukar-Valur á Ásvöllum klukkan 19.30.