Vonar að 28 kaflar verði hafnir fyrir lok ársins

Framvinduskýrsla um aðildarviðræður Íslands við ESB, sem kynnt var á dögunum staðfestir að viðræður ganga vel, að mati Össurar Skarphéðinssonar utanríkisráðherra. Hann vonast til þess að viðræður verði hafnar um 28 kafla af 33 fyrir árslok.

„Það sem mér finnst mikilvægast í skýrslunni er að framkvæmdastjórnin lýsir því yfir í skýrslunni að hún sé fullviss um að ESB muni í fyllingu tímans takast að kynna heildarlausn fyrir viðræðurnar þar sem tekið er tillit til bæði sérstöðu Íslands og væntinga hér á landi og að það muni um leið ríma við regluverk ESB,“ segir Össur og bætir því við að þetta megi túlka sem svo að samningsaðilar nálgist nú viðræðurnar á grundvelli sérþarfa Íslands.

Á kynningarfundi vegna framvinduskýrslunnar sagði Timo Summa, sendiherra ESB á Íslandi, að líkur væru á því að samningaviðræður hæfust í fjórum málaflokkum til viðbótar á svokallaðri ríkjaráðstefnu í lok mánaðarins. Nefndi hann þar kaflana um fjármálaþjónustu, hagtölur, dóms og innanríkismál og tollabandalagið.

Taldi Summa ekki ólíklegt að enn fleiri samningakaflar yrðu teknir upp fyrir árslok, en sem stendur hafa samningaviðræður þegar hafist um átján kafla og viðræðum er lokið um tíu þeirra.

Össur segist vongóður um að fyrir áramót verði viðræður hafnar í þeim 28 köflum sem Ísland hefur kynnt samningsafstöðu sína.