Leggjast gegn stofnun atvinnumáladeildar

Borgarstjórnarflokkur Sjálfstæðisflokksins leggst gegn tillögu borgarstjórans, Jóns Gnarr, um að stofna sameiginlega atvinnumáladeild hjá borginni. Í bókun Sjálfstæðisflokksins, sem lögð var fram á borgarráðsfundi í gær, kom fram að að borgarfulltrúar Sjálfstæðisflokksins, geti ekki fallist á að það sé gert með þeim hætti sem borgarstjórinn leggur tillöguna fram.

Tillaga borgarstjórans hljóðar svo að borgarráð samþykki að stofnaður verði stýrihópur um sérstök atvinnumál sem skipaður verði kjörnum fulltrúum. Hópnum til ráðgjafar verði embættismenn og starfsmenn borgarinnar sem að málaflokknum vinna. Jafnframt vill borgarstjóri að borgarráð samþykki að verkefni Atvinnutorgs og atvinnuátakshluta mannauðsskrifstofu verði sameinuð í nýrri atvinnumáladeild undir skrifstofu borgarstjóra og borgarritara.

Þá vill hann að samstarf við Hitt húsið og virkniráðgjöf þjónustumiðstöðva verði skilgreind í þjónustusamningum og/eða með öðrum hætti. Velferðarsviði og skrifstofu borgarstjóra og borgarritara er falið að útfæra verkefni og verksvið nýrrar atvinnumáladeildar með ítarlegri hætti og leggja fram fjárhagsáætlun.

Þessu eru Sjálfstæðismenn raunar sammála í grunninn, það er að segja, þeir eru hlynntir því að leggja aukna áherslu og einfalda umsjón með atvinnuátaksverkefnum á vettvangi Reykjavíkurborgar, þó þeir séu ósammála nálgun borgarstjórans.

Tillagan var samþykkt af meirihluta borgarráðs í gær, borgarfulltrúar Sjálfstæðisflokksins sátu hjá.