Hátt í 30 ungmenni villt á Bláfjallasvæðinu

Búið er að kalla út björgunarsveitir á höfuðborgarsvæðinu vegna hóps ungmenna sem er í villum á Bláfjallasvæðinu. Hópurinn, sem telur 28 manns sem allir eru heilir á húfi, er í símasambandi. Svo virðist sem veður á svæðinu hafi breyst snögglega og var þá ákveðið að óska eftir hjálp.

Mikið hefur gengið á hjá björgunarsveitum landsins í dag.

Björgunarsveitir af Kjalarnesi og úr Mosfellsbæ aðstoðuðu farþega rútu sem fór útaf veginum þannig að lá við veltu á Mosfellsheiðinni fyrr í kvöld vegna hálku.

29 erlendir ferðamenn voru í bílnum og sakaði þá ekki. Annar langferðabíll, sem kallaður var til svo hægt væri að aðstoða ferðamennina, komst ekki lengra en að Gljúfrasteini sökum fljúgandi hálku á veginum. Búið er að bjarga ferðamönnunum sem eru nú á Hótel Natura þar sem þeir fá heitt kakó og áfallahjálp.

Á sjöunda tímanum í kvöld voru svo sveitir frá Hellu og Hvolsvelli kallaðar út vegna rjúpnaskyttu sem saknað var við Litla Höfða á Dómadalsleið. Skyttan kom í leitirnar áður en björgunarsveitir voru komnar á staðinn.

Björgunarfélag Hornafjarðar var einnig kallað út í dag til leitar að bíl í á. Ökumaður bílsins, sem er stór breyttur jeppi, hringdi eftir aðstoð. Sagðist hann hafa lent í djúpum hyl á leið sinni yfir á og tilkynnti að eflaust þyrfti hann að synda til að komast á bakkann. Þegar hann hafði gefið þessar upplýsingar slitnaði símtalið og ekki náðist í hann strax aftur. Björgunarfélagið sendi því lið á líklega staði; á Stokksnes, í Fjörð og í Lón þar sem maðurinn reyndist staddur. Hafði hann synt í land og var orðinn nokkuð kaldur.