Meira en 40 veik börn á listanum

Stuðningsmiðstöð fyrir fjölskyldur og aðstandendur barna með sjaldgæfa og alvarlega sjúkdóma verður opnuð við hátíðlega athöfn í dag. Miðstöðin var stofnuð fyrir féð sem safnaðist í átakinu Á allra vörum.

Um hundrað milljónir söfnuðust í átakinu en Bára Sigurjónsdóttir, forstöðumaður miðstöðvarinnar, segir að enn eigi fleiri gjafir eftir að koma með í reikninginn.

Á milli fjörutíu og fimmtíu börn með alvarlega og sjaldgæfa sjúkdóma eru á lista miðstöðvarinnar og segir Bára að búið sé að bjóða fjölskyldum þeirra að nýta sér aðstöðuna. Flestar þeirra verða við opnunina í dag. Börnin eru flest sex ára eða yngri.

Miðstöðin er í 150 fermetra húsnæði við Austurströnd 3 á Seltjarnarnesi.

Guðbjartur Hannesson velferðarráðherra mun skrifa undir viljayfirlýsingu í húsinu klukkan eitt í dag.

Formleg opnunarathöfn hefst hins vegar klukkan 16 og stendur í tvær klukkustundir. Bára hvetur alla til að mæta.

„Þjóðin á þessa stöð. Það eru allir velkomnir.“

- sv