Sendiherra Íslendinga í Washington: Hátíðisdagur í Bandaríkjunum

„Þetta er hátíðisdagur, það er umfram allt það. Maður verður var við það allstaðar að það er kjördagur," segir Guðmundur Árni Stefánsson, sendiherra Íslands í Bandaríkjunum. „Fyrir gamlan pólitíkus eins og mig er þetta dýrðardagur að upplifa," segir hann jafnframt. Hann bætir því þó við að hann hafi ekki hugmynd um það, fremur en nokkur annar, hvernig niðurstöðurnar verða.

„Þetta er auðvitað hnífjafnt enda þótt það þurfi ansi margt að gerast til þess að Romney nái meirihluta kjörmanna. Þannig að mín tilfinning er sú að ef ekkert óvænt gerist þá eigi Obama að vinna tiltölulega öruggan sigur," segir Guðmundur Árni.

Hann segir að staðan sé tvísýn í tíu ríkjum en Romney þurfi að ná meirihluta kjörmanna í sjö af þeim ef hann ætlar að eiga möguleika á kjöri. Ohio er eitt þeirra ríkja sem mest hefur verið talað um í þessu samhengi. „En ef að það gerist, sem verður ljóst tiltölulega snemma, að Flórída falli með Obama þá er þetta eiginlega bara búið strax í byrjun talningar," segir Guðmundur Árni. „Hann þarf að vinna Ohio, Flórída og taka nokkur minni fylki með. Það þurfa þá öll vötn að falla með honum," segir Guðmundur Árni. Guðmundur Árni bendir á að kosningakerfið sé þannig að Romney fengi meirihluta atkvæða en samt tapað kosningunum.

Guðmundur segir að það veki gríðarlega athygli Bandaríkjamanna þegar hann segi þeim frá því að óformlegar skoðanakannanir bendi til þess að um 98% Íslendinga hallist á sveif með Obama. Aftur á móti sé Washington DC mikil demókrataborg. „Hér er talað um að Obama fái jafnvel 88% atkvæða og það er í samræmi við fyrri forsetakosningar," en bendir á að stutt sé að fara til að finna Repúblikanana.

Guðmundur Árni segir að um 1000 manns búi í Washington DC og nágrenni. Þar sé tiltölulega öflugt Íslendingafélag þannig að allir þekki alla.