Fjölmenni á hjólauppboði

Um tvö til þrjú hundruð manns mættu á reiðhjólauppboð lögreglunnar í dag. Boðin voru upp reiðhjól sem fundist hafa á höfuðborgarsvæðinu og enginn hefur hirt um að sækja. Uppboðið fór fram í húsnæði Vöku í Skútuvogi.

Lögreglan vekur athygli á því að tilkynnt var um á sjöunda hundrað stolin reiðhjól á síðasta ári. Aðeins hluti þeirra berst til óskilamunadeildar, jafnvel mánuðum eftir að þeim er stolið.

Lögregla brýnir fyrir fólki að geyma reiðhjól á eins öruggum stað og mögulegt er og skilja þau hvergi eftir ólæst. Þá hvetur lögreglan fólk til að skrá hjá sér raðnúmer reiðhjóla sinna til að auðvelda leit ef þeim er stolið.