Fylltu á þyrluna á næstu bensínstöð

Tveir austurrískir ævintýramenn eru á ferð og flugi um landið á eigin þyrlu og taka bílabensín á hana á næstu bensínstöð við þjóðveginn, þegar á vantar.

Þannig ráku heimamenn og ferðamenn í Hveragerði upp stór augu þegar erlend þyrla lenti óvænt skammt frá bensínstöð Atlantsolíu í bænum nýverið, tveir menn stukku út, ýttu henni að beinsíndælunni og fylltu á. Að því búnu hélt þyrlan leiðar sinnar, rétt eins og bíll hefði komið við til að fylla á.

Þarna voru austurrísku ofurhugarnir á ferð, flugmaður og ljósmyndari, en þeir komu fljúgandi á þyrlunni hingað til lands í gegnum Hjatlandseyjar og Færeyjar og lentu fyrst á Höfn. Síðan hafa þeir verið að fljúga vítt og breitt um landið til myndatöku og ætla að vera hér eitthvað fram í næsta mánuð og fljúga svo aftur heim á þyrlunni.

Þyrlan er af gerðinni Robinson-44, smíðuð í Bandaríkjunum, en mótornum hefur verið breytt þannig að hann brennir bílabensíni. Þar með miðast ferðalagið ekki út frá þeim fáu stöðum þar sem flugvélabensín er fáanlegt og ofurhugarnir eru þar með frjálsir sem fuglinn.

Skoða má myndskeið af mönnunum hér.