Gildi vill að FME rannsaki útboðið

Gildi – lífeyrissjóður hefur farið fram á að Fjármálaeftirlitið (FME) rannsaki hvort rétt hafi verið staðið að útboði á hlutafé í Eimskipafélagi Íslands. Í bréfi Gildis til FME í gær er einnig farið fram á að kannað verði hvort útfærsla á kaupréttum til stjórnenda Eimskips standist skoðun.

Almennu útboði með hlutabréf Eimskipafélagsins lauk klukkan fjögur í gær. „Útboðsgengið var fyrir fram ákveðið, 208 krónur á hlut. Samtals bárust áskriftir fyrir yfir ellefu milljarða króna eða sem nemur yfir fimmfaldri umframeftirspurn,“ segir í tilkynningu Eimskips. „Í ljósi mikillar umframeftirspurnar mun félagið, líkt og fram kom í skráningarlýsingu þess, auka við framboðið og selja 6 milljónir eigin hluta, eða sem nemur þremur prósentum af útgefnu hlutafé.“ Samtals eru því seldir 16 milljón hlutir eða sem nemur átta prósentum af útgefnu hlutafé Eimskips. Alls skráðu um 2.500 fjárfestar sig fyrir hlutum í almenna útboðinu.

Gildi, sem ákvað að taka ekki þátt í hlutafjárútboðinu vegna hárra kauprétta stjórnenda Eimskips, á fyrir 0,6 prósent hlutabréfa í félaginu. Hlutinn eignaðist sjóðurinn í nauðasamningum félagsins á árinu 2009.