Nota gervitunglamerki til þorskrannsókna

Rannsóknafyrirtækið Laxfiskar og samstarfsaðilar hafa tekið í notkun nýja tækni sem gerir kleift að fylgjast með ferðum þorska við Ísland. Tæknin byggir á fiskmerkjum sem senda upplýsingar um ferðir fiskanna um gervitungl. Þannig fást gögn um hegðun og umhverfi fiskanna án þess að endurveiða fiskana, sem er nýjung í þorskrannsóknum. Slík gögn gefa meðal annars nýjar hagnýtar upplýsingar um þorskinn þegar hann dvelur utan veiðislóðar.

Jóhannes Sturlaugsson hjá Laxfiskum segir að merkin séu á ýmsan hátt sambærileg þeim sem notuð hafa verið til hvalarannsókna, en gögnin frá gervitunglafiskmerkjunum skila sér hins vegar á þann hátt að merkin losa sig af fiskunum á fyrir fram ákveðnum tíma og fljóta upp í yfirborð þar sem þau geta fyrst náð sambandi við gervitungl ARGOS-gervitunglakerfisins. Um gervitungl berast þannig mæligögn yfir fiskdýpi á farleiðinni hverju sinni, sem og sjávarhita og birtumagn.

Fyrstu niðurstöður rannsókna sem hófust í vor lofa góðu. „Vænir hrygningarfiskar sem merktir voru í Faxaflóa hafa meðal annars komið fram bæði sunnan við land og norðan, allt að 600 kílómetrum frá merkingarstaðnum,“ segir Jóhannes.

Laxfiskar kynna rannsóknina á þorskinum, ásamt öðrum rannsóknum, á opnum fundi á þriðjudaginn kemur í Víkinni – Sjóminjasafninu, Grandagarði.