Finnst aðeins á tveimur bæjum

Sýnatökur vegna smitandi barkabólgu benda til að sjúkdómurinn sé bundinn við tvö bú á Austurlandi.

Matvælastofnun hafa borist niðurstöður úr öllum mjólkurtanksýnum, alls 655 sýnum, frá Tilraunastöðinni á Keldum og voru þau öll neikvæð fyrir mótefnum gegn herpesveirunni sem veldur sjúkdómnum.

Sýnin voru tekin á öllum þeim búum sem hafa lagt inn mjólk í mjólkurstöð á undanförnum dögum.

Enn er beðið niðurstaðna úr sýnum sem voru send til rannsóknar í lok síðustu viku. Fyrirhugaðar eru frekari sýnatökur, meðal annars á búunum tveimur, til að kanna nánar útbreiðslu innan þeirra.