Aka tónleikagestum milli staða

Forsvarsmenn Iceland airwaves hafa ákveðið að aka tónleikagestum milli tónleikastaða í kvöld vegna veðursins. Strætóar munu ganga reglulega milli Hörpunnar og Listasafnsins til klukkan eitt í nótt.

„Ég segi ekki að fólk hefði annars verið í hættu. En það hefði verið mjög leiðinlegt fyrir tónleikagesti að ganga þarna á milli," segir Egill Tómasson hjá Iceland airwaves.

Harpan og Listasafnið eru tveir helstu tónleikastaðir hátíðarinnar en til að komast þar á milli er nauðsynlegt að ganga meðfram Sæbraut. Þar hefur sjór gengið yfir vegna veðursins í dag og leiðin verið heldur óskemmtileg yfirferðar. „Það hefur verið svakalegur strengur þarna á milli," segir Egill. Því var ákveðið að hafa reglulegar strætóferðir milli staðanna.

„Þetta er gert til að koma í veg fyrir að tónleikagestir verði blautir og kaldir," segir Egill.

Þrátt fyrir veðurofsann hefur engum tónleikum á dagskrá Airwaves verið aflýst og stefna forsvarsmenn hátíðarinnar á að halda sig við áætlun. Hins vegar hefur einstaka off-venue tónleikum verið aflýst.