Formaður ræðir ekki þotuveiki flugþjóna

„Þetta málefni er ekki til umræðu af hálfu stéttarfélagsins í fjölmiðlum,“ segir Sigrún Jónsdóttir, formaður Flugfreyjufélags Íslands, aðspurð um veikindi flugþjóna í millilandaflugi.

Eins og fram kom í Fréttablaðinu á mánudag var flugþjónum í flugi Icelandair til Frankfurt í júlí gefið súrefni í flugstjórnarklefanum eftir að þeir fundu ítrekað til verulegra óþæginda í fluginu. Kvörtuðu þeir undan miklum höfuðverk, svima og doða í fótum. Haft var eftir Guðjóni Arngrímssyni, upplýsingafulltrúa Icelandair, að flugþjónar hefðu tilkynnt um viðlíka óþægindi einstaka sinnum síðan.

Sigrún ítrekar að fulltrúar Flugfreyjufélagsins ræði málið eingöngu við viðkomandi fyrirtæki en ekki við almenning. „Mér finnst að það eigi fullt erindi við fyrirtækið af hálfu stéttarfélagsins og við leysum það þannig þegar og ef það kemur upp. Þetta eru mál sem leysast innanhúss,“ segir formaðurinn.

Rannsóknarnefnd flugslysa í Þýskalandi vísar til þess í bráðabirgðaniðurstöðu varðandi uppákomuna í júlí að Boeing, sem framleiddi þotuna sem notuð var í umræddu flugi, segði vandamál í loftræstingu hafa komið upp í þessari tilteknu flugvélagerð. Guðjón sagði loftræstinguna í þotunni hafa verið hreinsaða og margyfirfarna síðan þennan dag í júlí. Mælingar hafi ætíð sýnt að loftið væri í fullkomnu lagi. - gar