Óveður á Vestfjörðum

Óveður er nú orðið á Vestfjörðum með hvössum vindi og snjókomu og varar Vegagerðin og Veðurstofan fólk við að vera þar á ferð. Sumstaðar er þegar orðið ófært. Vindhraðinn er víða kominn uppundir 20 metra á sekúndu og sumstaðar þar yfir.

Það er líka farið að hvessa og snjóa á Norðurlandi vestra og spáð er hvassviðri um allt vorðanvert land síðar í dag og fram á morgun. Þar verður ekkert ferðaveður í dag og er sumstaðar farið að snjóa og skafa. Það á líka að hvessa verulega á Snæfellsnesi og allt suður á Kjalarnes, en í öðrum landshlutum verður veðrið skaplegra, þótt hvessa muni á Suðurlandi og Austurlandi i kvöld.