Börnin leika sér við hættulegan brunn

Dælustöðinni í Grundarhverfi á Kjalarnesi var upphaflega læst með loki. Börnin í hverfinu hafa fundið út hvernig á að opna brunninn. Svæðisstjóri hjá Orkuveitunni segir slysahættu vegna brunnsins.

Lok á dælustöð í Grundarhverfi á Kjalarnesi stendur ólæst og opið. Íbúi á Kjalarnesi, Sigrún Jóhannsdóttir, segir staðinn vinsælan hjá krökkum sem búa í grenndinni. Hún hefur séð börn allt niður í sjö ára leika sér við dælustöðina.

„Krakkarnir fundu fljótlega leið til að opna brunninn og sumir fóru niður. Þetta hefur verið voðalega spennandi,“ segir Sigrún Jóhannsdóttir, sem býr rétt hjá dælustöðinni.

Upphaflega var lokinu læst en var ekki nógu stíft svo það small úr læsingunni ef það var togað upp í hliðunum.

„Við erum búin að hringja í þónokkur skipti út af þessu og þeir hjá Orkuveitunni hafa komið hingað í þrígang. Nú er búið að sjóða járnbita inn í lokið til að styrkja það, en það er alveg ólæst þannig að það liggur bara laust ofan á brunninum. Þeir settu bara tvo stóra steina ofan á lokið en það er lítið mál að velta þeim ofan af,“ segir Sigrún.

Starfsmenn Orkuveitunnar eru meðvitaðir um vandamálið.

„Það er vandræðaástand með þennan brunn. Við erum búnir að gera ráðstafanir þannig að lokið sé ekki slitið upp af honum, en það virðist ekki hafa dugað,“ segir Arnór Einarsson svæðisstjóri.

„Ég veit ekki hvað vakir fyrir þessum grislingum þarna, en það eru greinilega krakkar sem hafa gaman af að kíkja á skólpið,“ segir Arnór.

Hann telur að mikil slysahætta geti stafað af brunninum.

„Það á ekkert að vera að flækjast þarna, þetta er stórhættulegt og ekki fyrir hvern sem er. Við erum sérútbúnir þegar við förum þarna niður, með hjálm og fleira,“ segir Arnór.

Hann segir að Orkuveitan muni reyna að laga lokið á brunninum við fyrsta tækifæri.

„Það fóru menn þangað strax eftir mat til að reyna að betrumbæta ástandið.“

katrin@frettabladid.is