Yfir 600 manns tóku þátt í æfingunni

Flugslysaæfingin á Reykjavíkurflugvelli í dag virðist hafa tekist mjög vel í flesta staði að sögn Árna Birgissonar, samræmingarstjóra flugvalla hjá Isavia. Æfingunni lýkur í dag en alls taka um 630 manns þátt í henni, sem gerir æfinguna að þeirri umfangsmestu sem haldin hefur verið hérlendis.

Líkt var eftir brotlendingu flugvélar með 100 manns innanborðs á flugvellinum og þurftu viðbragðsaðilar að leysa fjölmörg verkefni á slysstað. Á meðal þeirra sem tóku þáttu voru prestar, leiknir aðstandendur og lögreglumenn.

Í fréttatilkynningu frá Isavia segir Árni að nauðsynlegt sé að menn viti hvað eigi að gera ef flugslys verður á Reykjavíkurflugvelli. „Reynslan sýnir að hætta á hópslysum á borð við flugslys er afar lítil en nauðsynlegt er að viðbragðsaðilar æfi áætlanir með reglubundnum hætti svo bregðast megi fumlaust við ef slys kynni að bera að höndum.