Vilja hækka hámarkshraða á Reykjanesbraut

Æskilegt er að hækka hámarkshraða á Reykjanesbraut upp í 110 kílómetra á klukkustund til langs tíma litið, sagði Ögmundur Jónasson innanríkisráðherra á Alþingi í dag. Þorgerður Katrín Gunnarsdóttir, þingmaður Sjálfstæðisflokksins, spurði hann út í málið. Ögmundur sagði þó að ekki væri tímabært að gera þessa breytingu núna því að skilyrði væru ekki uppfyllt.

Til þess að hægt væri að uppfylla skilyrðin þyrfti að banna reiðhjólar alveg á Reykjanesbraut og það þyrfti að koma upp vegriðum, en það hefur ekki verið gert. „Hugleiðingar um að hækka hámarkshraðann eru því ekki tímabærar og hyggst innanríkisráðherra ekki beita sér fyrir því að svo stöddu," sagði Ögmundur.

Ragnheiður Elín Árnadóttir, þingmaður Sjálfstæðisflokksins, tók einnig til máls og sagði að það ætti að hraða vinnu við það að setja upp vegrið á Reykjanesbraut.

Hámarkshraði í dreifbýli, á bundnu slitlagi, er á flestum stöðum 90 km/klst.

Á fimmtudag ræddi fréttastofa Stöðvar 2 og Vísis við Sigurgeir Friðriksson leigubílstjóra sem skaust fimmtán metra upp í loftið þegar hann fór ofan í geil á milli akbrautanna á Reykjanesbraut og fór upp aftur. Hann telur sjálfur kraftaverk að ekki fór verr og vill vegrið upp hið fyrsta.