Segir laxarökin ekki virka á alla Þjórsá

Örlög rammaáætlunar eru nú komin í hendur atvinnuveganefndar Alþingis. Formaður þingnefndarinnar, Kristján L. Möller, efast um laxarök gegn virkjunum í Þjórsá og segir að skapa verði þverpólitíska sátt ef rammaáætlun eigi að lifa af ríkisstjórnina.

Fyrri umræðu um rammann lauk á Alþingi í vikunni og er málið nú komið inn á borð atvinnuveganefndar. Ríkisstjórnin er gagnrýnd fyrir að færa rammaáætlun úr faglegu ferli yfir í pólitískt og er þá meðal annars bent á að hún hafi fært þrjár virkjanir í neðri Þjórsá úr nýtingarflokki yfir í biðflokk.

Spurður hvort hann styðji þá ákvörðun svarar Kristján í viðtali í fréttum Stöðvar 2:

"Ég hef sagt það, - mín skoðun var sú - að drögin, eins og þau voru kynnt í umhverfismati áætlana, hefði átt að leggja fyrir þingið og þingið hefði átt að fá að takast á við það."

Með öðrum orðum: Ráðherrarnir áttu ekki að færa virkjanir til í lokaferlinu.

"Ég hef hlustað á þessi rök sem komið hafa fram, reyndar mjög seint, laxarökin, og ég hlusta á þau gagnvart Urriðafossi. Mér finnst þau ekki virka gagnvart efri virkjununum," segir Kristján.

Tveir virkjanir eru áformaðar fyrir ofan Urriðafossvirkjun, Holtavirkjun og Hvammsvirkjun.

Kristján segir að ef ekki næst víðtæk sátt um rammaáætlun blasi við að næsta ríkisstjórn muni einfaldlega breyta henni. Þannig séu lögin. Þessvegna sé mikilvægt að menn reyni að vinna rammaáætlun þannig að þverpólitísk sátt verði um hana.

"Hún sé þá ekki rammaáætlun viðkomandi ríkisstjórna og þær séu teknar og breytt. Það var ekki hugmyndin með rammaáætlun. Rammaáætlun átti að vera til þess að skapa sem mesta sátt um hana og þessu deilumáli yrði þá lokið."