Hótar úrsögn ef Festa kaupir bréf í Eimskipi

Vilhjálmur Birgisson, formaður Verkalýðsfélags Akraness, segir að ef lífeyrissjóðurinn Festi muni taka þátt í kaupréttarútboði á Eimskip þá muni félagið grípa til róttækra aðgerða sem gætu verið fólgnar í því að félagsmenn Verkalýðsfélags Akraness sem eru aðilar að Festu lífeyrissjóði gangi í annan lífeyrissjóð.

Þetta sagði Vilhjálmur í einkasamtali við Gylfa Jónasson, framkvæmdastjóra sjóðsins, en Verkalýðsfélag Akraness er aðili að honum. Vilhjálmur greinir frá samtalinu á vef Verkalýðsfélags Akraness í dag. Samkvæmt frásögn á vefnum svaraði Gylfi því til að hann hefði sent skilaboð út til stjórnarmanna sjóðsins í gær varðandi þetta útboð og mun niðurstaða liggja fyrir klukkan 14 í dag um hvað sjóðurinn muni gera.

„Það er alveg morgunljóst að Verkalýðsfélag Akraness mun og ætlar sér ekki að sætta sig við að verið sé að fjárfesta í fyrirtæki sem ætlar að rétta lykilstjórnendum Eimskips kaupréttarsamninga á silfurfati á sama tíma og sjóðurinn hefur tapað 500 milljónum króna vegna gjaldþrots Eimskips á sínum tíma. En lífeyrissjóðirnir töpuðu á gjaldþroti Eimskips hátt í 15 milljörðum króna samtals og á þeirri forsendu meðal annars er það skylda lífeyrissjóðskerfisins að senda skýr skilaboð út til fyrirtækja um að sjóðsfélagar í lífeyrissjóðum muni ekki sætta sig við að græðgisvæðingin skjóti aftur rótum inni í þessum fyrirtækjum," segir á vef Verkalýðsfélags Akraness.