Dæmd fyrir að ræna rosknar konur - sagði þær auðveldan pening

Hæstiréttur Íslands hefur staðfest átján mánaða dóm yfir tæplega tvítugri stúlku fjölmörg afbrot, meðal annars rán. Glæpirnir voru allir framdi á síðasta ári, en tvö ránsbrot voru framin í október árið 2011. Í öllum tilvikum beitti stúlkan umtalsverðu afli til að ná töskum af rosknum konum, sem hún veittist að, en þær brugðust við á þann hátt að halda fast í töskurnar.

Stúlkan beitti þannig líkamlegu ofbeldi gagnvart konunum og tók af þeim fjármuni og önnur verðmæti í þremur tilvikanna og reyndi að gera það í því fjórða.

Í öðru brotanna, sem framin voru 6. október 2011, urðu afleiðingarnar þær að árásarþoli féll í götuna og hlaut brot á miðhandarbeini og blóðnasir. Þá hlaut árásarþoli tvö rifbeinsbrot og eymsli á öxl vegna brotsins 21. sama mánaðar. Brotin voru ófyrirleitin og beindust gegn eldri konum, sem lítið viðnám gátu veitt, en um ástæðu þess að þær urðu fyrir valinu sem fórnarlömb bar stúlkan fyrir héraðsdómi að þær hafi verið „auðveldur peningur".

Í niðurstöðu Héraðsdóms Reykjavíkur kemur fram að stúlkan hafi lagst inn á geðdeild eftir afbrotahrinuna og hún hafi síðan þá haldið sig frá fíkniefnum.