Dómur yfir barnaníðingi mildaður

Hæstiréttur Íslands mildaði í dag dóm yfir karlmanni sem var dæmdur í Héraðsdómi Reykjavíkur fyrir að misnota stúlku kynferðislega yfir 7 ára tímabil. Misnotkunin hófst árið 2001 þegar stúlkan var ellefu ára gömul. Maðurinn var dæmdur í sex ára fangelsi í Héraðsdómi Reykjavíkur en hæstiréttur mildaði dóminn um eitt ár.

Í dómi héraðsdóms kemur fram að maðurinn hafi byrjað að misnota stúlkuna skömmu eftir að hún missti föður sinn. Stúlkan var oft í pössun á heimili mannsins, sem nýtti tækifærið og misnotaði hana ítrekað.

Meðal þess sem maðurinn er sakfelldur fyrir er að hafa þröngvað stúlkunni með ofbeldi til samræsði þegar hún var fjórtán ára gömul. Maðurinn afklæddi hana þá þrátt fyrir að hún hafi beðið hann um að gera það ekki. Svo lagðist hann ofan á hana og nauðgaði henni.

Maðurinn neitaði þessu en lýsing hans er töluvert frábrugðin ákæruliðnum. Þannig segir maðurinn að hann hafi verið nýkominn úr baði þegar stúlkan fór í fangið á honum og byrjaði að kyssa hann. Síðan hafi „leikurinn" borist inn í svefnherbergi þar sem hann vildi meina að þau hafi sofið saman með vilja beggja aðila.

Skemmst er frá því að segja að dómarar Héraðsdóms Reykjavíkur mátu framburð mannsins afar ólíklegan og dæmdu hann sekan fyrir nauðgunina auk annarra ákæruliða sem honum var gefið að sök. Hann játaði einnig að vera haldin kynferðislegri girnd til unglingsstúlkna.