Vann hundrað milljónir á fyrsta miðann sinn

Kona á miðjum aldrei keypti sér sinn fyrsta víkingalottómiða í vikunni. Það skipti engum togum að hún fékk allar tölur réttar og vann einar 103 milljónir króna. "Það var ánægður vinningshafi sem kom til Getspár í gær með vinningsmiðann góða frá síðasta Víkingalottóútdrætti," segir Inga Huld Sigurðardóttir, markaðsstjóri íslenskrar getspár. Konan var stödd í N1 Kópavogi og lenti í röð á eftir konu sem var að versla sér Víkingalottómiða. Þá tók konan þá ákvörðun um að versla sér sinn fyrsta Víkingalottómiða og keypti sér tíu raða miða ásamt Jóker og það var einmitt tíunda og síðasta röðin sem gaf allar tölurnar réttar. Konan á uppkomin börn og barnabörn sem fá að njóta vinningsins með henni. Fyrst ætlaði umrædd kona ekki að trúa því að hún hefði fengið allar tölur réttar. Hún tók því mynd af miðanum og sendi til sonar síns sem staðfesti að "jú víst væri mamma með allar tölur réttar og orðin nýr milljónamæringur". Konan ætlar að þiggja fjárhagsráðgjöf sem Getspá bíður uppá og taka ákvarðanir í kjölfar þess hvernig vinningnum verði sem best ráðstafað á góðan hátt.