Gistinóttum Íslendinga í Skandinavíu fjölgaði

Gistinóttum Íslendinga í Skandinavíu fjölgaði mikið milli ára. Íslendingar keyptu rúmlega þriðjungi fleiri gistinætur í Osló og Stokkhólmi í sumar heldur en árið á undan. Þetta kemur fram á vef Túrista. Upplýsingar frá Ferðamálastofu benda til þess að utanlandsferðum Íslendinga hafi almennt fjölgað um tæp sjö prósent í sumar samanborið við síðasta ár. Hins vegar er engu líkara en þorri þeirra sem brugðu sér af landi brott hafi skellt sér til Noregs eða Svíþjóðar, því í höfuðborgum þeirra landa versluðu Íslendingar yfir 33% fleiri gistinætur en árið áður. Íslendingum í Danmörku fjölgaði líka milli ára en ekki jafnmikið. Þannig voru um 8% fleiri gistinætur skráðar á Íslendinga í Kaupmannahöfn í sumar en árið áður.