SUS gerir tilboð í plastmál forsætisráðherra

„Í tilefni af því að í dag er nákvæmlega ár þar til alþingiskosningar þurfa í síðasta lagi að fara fram hefur Samband ungra sjálfstæðismanna (SUS) gert Sjónlistarmiðstöðinni á Akureyri tilboð í plastmál sem miðstöðin keypti nýlega og Jóhanna Sigurðardóttir, forsætisráðherra, hafði drukkið úr."

Þetta segir í tilkynningu frá SUS. Þar kemur fram að tilboðið hljóðar upp á 210.000 kr. sem er tvöföld sú fjárhæð sem Sjónlistamiðstöðin greiddi fyrir það, og gildir tilboðið til kl. 16 á mánudaginn.

„SUS telur að málið hafi mikið menningarlegt og sögulegt gildi sem eina málið sem forsætisráðherra, í verstu ríkisstjórn sögunnar, hefur klárað. Sem dæmi um mál sem forsætisráðherra hefur ekki klárað má nefna fyrirheit um lausn á skuldavanda heimilanna og blessunarlega hefur henni ekki tekist að rústa fiskveiðistjórnkerfinu og stjórnarskránni. Ekkert af þessu hefur henni tekist þótt hún hafi haft til þess rúm þrjú ár," segir í tilkynningunni.

„SUS hefur þegar fjármagnað kaupin, náist samningar við Sjónlistamiðstöðina, með framlögum frá félagsmönnum og öðrum velunnurum SUS."