Karlar í kvennaklefa

Vegna endurbóta á karlaklefanum í Laugardalslaug hefur helmingur kvennaklefans verið stúkaður af fyrir karla. Framkvæmdum lýkur um mitt næsta ár.

Karlkynsgestir Laugardalslaugar hafa nú í rúma viku haft helming kvennaklefans til afnota þar sem verið er að endurnýja búningsklefa þeirra.

Búist er við því að röskun verði næstu mánuði en Logi Sigurfinnsson, forstöðumaður laugarinnar, segir gesti hafa sýnt breytingunum mikinn skilning. Endurbætur á lauginni hafa staðið yfir um nokkra hríð en áætlað er að þeim ljúki fyrir mitt næsta ár.

Logi segir að nú sé rétti árstíminn til að ganga í þessi mál, enda sé aðsóknin „ekki nema“ um 40 þúsund manns á mánuði.

„Við stefnum að því að klára karlaklefann fyrir lok janúar og það er unnið hörðum höndum að því. Eftir það verður farið í að endurnýja kvennaklefann,“ segir Logi. Fólk hafi einnig nýtt sér nýju útiklefana en þar eru 70 skápar, bæði fyrir konur og karla.

Samkvæmt heimildum Fréttablaðsins var nokkuð spennufall meðal þeirra karla sem hafa nýtt sér þessi fyrrum helgu vé. Þar sé afar svipað umhorfs og í karlaklefunum gömlu. Meira að segja baðvogin Fröken Halldóra, sem þjónað hefur karlgestum um árabil, hefur verið færð yfir.

Þetta eru ekki einu breytingarnar í laugunum því að þar til karlaklefinn verður fullbúinn hefur afgreiðslu sundlaugarinnar verið lokað og gamla afgreiðslan norðan megin í húsinu tekin í notkun á ný.

Logi segir laugargesti hafa sýnt einstaka biðlund á meðan framkvæmdum hefur staðið.

„Fólk hefur verið ótrúlega jákvætt. Við vorum til dæmis að brjóta allt og bramla hérna úti síðasta vetur og fólk fjölmennti þrátt fyrir það á hverjum degi. Gestirnir sýna þessu svo mikinn skilning því að þeir átta sig á þörfinni á endurbótunum.“thorgils@frettabladid.is